ಮಂಗಳೂರು: ಕರ್ನಾಟಕ ಹಕ್ಕಿ ಹಬ್ಬದ 12ನೇ ಆವೃತ್ತಿ 2026ರ ಜನವರಿ 9ರಿಂದ 11ರವರೆಗೆ ಮಂಗಳೂರಿನ ಪಿಲಿಕುಳ ಜೈವಿಕ ಉದ್ಯಾನವನದಲ್ಲಿ ನಡೆಯಲಿದೆ. ರಾಜ್ಯದ ಅತ್ಯಂತ ಜೀವವೈವಿಧ್ಯ ಸಮೃದ್ಧ ಕರಾವಳಿ ಪ್ರದೇಶದಲ್ಲಿ ಈ ಹಬ್ಬವನ್ನು ಆಯೋಜಿಸಲಾಗಿದೆ.
ಈ ಬಾರಿ ಹಕ್ಕಿ ಹಬ್ಬದ ರಾಯಭಾರಿಯಾಗಿ ಬಿಳಿ ಹೊಟ್ಟೆಯ ಮೀನು ಗಿಡುಗ (ವೈಟ್ ಬೆಲಿಡ್ ಸೀ ಇಗಲ್) ಅನ್ನು ಆಯ್ಕೆ ಮಾಡಲಾಗಿದೆ. ತೀರಗಳು, ನದಿಮುಖಗಳು, ನದಿಗಳು ಹಾಗೂ ದೊಡ್ಡ ಜಲಮೂಲಗಳಲ್ಲಿ ಕಂಡುಬರುವ ಈ ಭವ್ಯ ಹಕ್ಕಿ, ಆರೋಗ್ಯಕರ ಕರಾವಳಿ ಮತ್ತು ಚೌಗು ಪ್ರದೇಶ ಪರಿಸರ ವ್ಯವಸ್ಥೆಗಳ ಪ್ರಮುಖ ಸಂಕೇತವಾಗಿದೆ. ಜಲಚರ ಅವಾಸಸ್ಥಾನಗಳು ಮತ್ತು ಮೀನು ಸಂಪತ್ತಿನ ಆರೋಗ್ಯವನ್ನು ಸೂಚಿಸುವ ಪ್ರಮುಖ ಸೂಚಕ ಪ್ರಭೇದವಾಗಿರುವುದರಿಂದ, ಕರಾವಳಿ ಮತ್ತು ನದಿಪಾತ್ರ ಪರಿಸರ ಸಂರಕ್ಷಣೆಯ ಅಗತ್ಯತೆಯನ್ನು ಎತ್ತಿಹಿಡಿಯುವ ಉದ್ದೇಶದಿಂದ ಇದನ್ನು ಮ್ಯಾಸ್ಕಾಟ್ ಆಗಿ ಆಯ್ಕೆ ಮಾಡಲಾಗಿದೆ.
ಮಂಗಳೂರು ತನ್ನ ದೀರ್ಘ ಕರಾವಳಿ ಹಾಗೂ ಬಹು ನದಿಗಳು, ನದಿಮುಖಗಳು, ಮ್ಯಾಂಗ್ರೂವ್ಗಳು, ಚೌಗು ಪ್ರದೇಶಗಳು, ಲ್ಯಾಟರೈಟ್ ಪ್ರಸ್ಥಭೂಮಿಗಳು ಮತ್ತು ಅರಣ್ಯ ಪ್ರದೇಶಗಳೊಂದಿಗೆ ವಿಶಿಷ್ಟ ಪರಿಸರ ವೈವಿಧ್ಯ ಹೊಂದಿದೆ. ಈ ಆವಾಸಸ್ಥಾನಗಳು ಸಮುದ್ರ ಪಕ್ಷಿಗಳು, ತೀರ ಪಕ್ಷಿಗಳು, ರಾಪ್ಟರ್ಗಳು, ಜಲಪಕ್ಷಿಗಳು ಹಾಗೂ ಅರಣ್ಯ ಪ್ರಭೇದಗಳಂತಹ ಅನೇಕ ನಿವಾಸಿ ಮತ್ತು ವಲಸೆ ಹಕ್ಕಿಗಳಿಗೆ ಆಶ್ರಯವಾಗಿವೆ. ಪಶ್ಚಿಮ ಹಾರಾಟ ಮಾರ್ಗದ ಭಾಗವಾಗಿರುವ ಈ ಪ್ರದೇಶವು ವಲಸೆ ಹಕ್ಕಿಗಳಿಗೆ ಪ್ರಮುಖ ನಿಲುಗಡೆ ಹಾಗೂ ಚಳಿಗಾಲದ ತಾಣವಾಗಿಯೂ ಕಾರ್ಯನಿರ್ವಹಿಸುತ್ತದೆ.
ಹಕ್ಕಿ ಹಬ್ಬದ ಅಂಗವಾಗಿ ಪಕ್ಷಿವೀಕ್ಷಣಾ ಪಥಗಳು, ನುರಿತ ತಜ್ಞರೊಂದಿಗೆ ಕಾರ್ಯಾಗಾರಗಳು, ಪ್ರದರ್ಶನಗಳು ಮತ್ತು ಸಮುದಾಯದ ಭಾಗವಹಿಸುವಿಕೆ ಕಾರ್ಯಕ್ರಮಗಳು ನಡೆಯಲಿವೆ. ಈ ಮೂಲಕ ಪ್ರಕೃತಿಯೊಂದಿಗೆ ಸಾರ್ವಜನಿಕ ತೊಡಗಿಸಿಕೊಳ್ಳುವಿಕೆಯನ್ನು ಬಲಪಡಿಸುವುದು, ಸಂರಕ್ಷಣಾ ಜಾಗೃತಿಯನ್ನು ಹೆಚ್ಚಿಸುವುದು ಹಾಗೂ ಸುಸ್ಥಿರ ಪರಿಸರ ಪ್ರವಾಸೋದ್ಯಮವನ್ನು ಉತ್ತೇಜಿಸುವುದು ಹಬ್ಬದ ಉದ್ದೇಶವಾಗಿದೆ.
ಈ ಹಬ್ಬದ ಮತ್ತೊಂದು ವಿಶೇಷವೆಂದರೆ, ಮಂಗಳೂರಿನ ವಿವಿಧ ಕಾಲೇಜುಗಳಿಂದ 160ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಭಾಗವಹಿಸಲಿದ್ದು, ಅವರಿಗೆ ಪಕ್ಷಿ ವೀಕ್ಷಣೆ ಹಾಗೂ ಪಕ್ಷಿಗಳ ಪರಿಸರ ಮಹತ್ವದ ಕುರಿತು ಪರಿಚಯ ನೀಡಲಾಗುತ್ತದೆ. ಯುವ ಪೀಳಿಗೆಯಲ್ಲಿ ಪರಿಸರ ಸಂರಕ್ಷಣೆಯ ಅರಿವು ಮೂಡಿಸುವ ದೃಷ್ಟಿಯಿಂದ ಈ ಕಾರ್ಯಕ್ರಮ ಮಹತ್ವ ಪಡೆದಿದೆ.
