ಬೆಂಗಳೂರು: ಎಕ್ಸಾಸ್ಟ್‌ನಿಂದ ಬೆಂಕಿ ಉಗುಳುವಂತೆ ಅಕ್ರಮವಾಗಿ ಮಾರ್ಪಡಿಸಿದ್ದ ಕಾರನ್ನು ಸಾರ್ವಜನಿಕ ರಸ್ತೆಯಲ್ಲಿ ಚಲಾಯಿಸಿದ್ದ ಕೇರಳದ ವಿದ್ಯಾರ್ಥಿಗೆ ಬೆಂಗಳೂರು ಯಲಹಂಕ ಪ್ರಾದೇಶಿಕ ಸಾರಿಗೆ ಕಚೇರಿ (RTO) ಭಾರೀ ದಂಡ ವಿಧಿಸಿದೆ. ಮೋಟಾರ್ ವಾಹನ ನಿಯಮಗಳಿಗೆ ವಿರುದ್ಧವಾದ ಈ ಮಾರ್ಪಾಡಿಗಾಗಿ ವಿದ್ಯಾರ್ಥಿಗೆ ₹1,11,500 ದಂಡ ಕಟ್ಟಬೇಕಾಯಿತು.
ಈ ಸಂಬಂಧ ಬೆಂಗಳೂರು ನಗರ ಸಂಚಾರ ಪೊಲೀಸ್ ಹಂಚಿಕೊಂಡಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ವಿಡಿಯೋದಲ್ಲಿ ಕಾರಿನ ಎಕ್ಸಾಸ್ಟ್‌ನಿಂದ ಬೆಂಕಿಯ ಜ್ವಾಲೆಗಳು ಹೊರಬರುತ್ತಿರುವುದು ಸ್ಪಷ್ಟವಾಗಿ ಕಾಣುತ್ತದೆ. ನಂತರದ ದೃಶ್ಯದಲ್ಲಿ ದಂಡ ಪಾವತಿಯ ರಸೀದಿ ತೋರಿಸಲಾಗಿದ್ದು, ಕೊನೆಯಲ್ಲಿ ಜಪ್ತಿ ಮಾಡಲಾದ ವಾಹನದ ಪಕ್ಕದಲ್ಲಿ ನಿಂತಿರುವ ಪೊಲೀಸ್ ಅಧಿಕಾರಿಯ ದೃಶ್ಯವಿದೆ.
ಈ ಘಟನೆಯ ಕುರಿತು ಬೆಂಗಳೂರು ಟ್ರಾಫಿಕ್ ಪೊಲೀಸ್ ಕಟುವಾಗಿ ಪ್ರತಿಕ್ರಿಯಿಸಿ,
“ಎಕ್ಸಾಸ್ಟ್‌ನಿಂದ ಬೆಂಕಿ? ಅದರ ಬೆಲೆ ಕಟ್ಟಲೇಬೇಕು. ಸಾರ್ವಜನಿಕ ರಸ್ತೆಗಳು ಸ್ಟಂಟ್ ಮಾಡುವ ಜಾಗಗಳಲ್ಲ” ಎಂದು ಎಚ್ಚರಿಕೆ ನೀಡಿದೆ.
ಇದೇ ವೇಳೆ ಇಲಾಖೆ ಮತ್ತೊಂದು ಸಂದೇಶದಲ್ಲಿ,
“ಸಾರ್ವಜನಿಕ ರಸ್ತೆಗಳು ಸ್ಟಂಟ್‌ಗಳಿಗೆಲ್ಲಲ್ಲ. ಎಕ್ಸಾಸ್ಟ್‌ನಿಂದ ಸ್ಪಾರ್ಕ್ ಅಥವಾ ಬೆಂಕಿ ಹೊರಬರುವಂತೆ ವಾಹನವನ್ನು ಮಾರ್ಪಡಿಸುವುದು ಕಾನೂನುಬಾಹಿರ. ಇಂತಹ ಸ್ಟಂಟ್‌ಗಳಿಗೆ ನೀವು ಬೆಲೆ ಕಟ್ಟಬೇಕಾಗುತ್ತದೆ” ಎಂದು ತಿಳಿಸಿದೆ.
ಸಾರ್ವಜನಿಕ ಸುರಕ್ಷತೆಯನ್ನು ಅಪಾಯಕ್ಕೆ ಒಡ್ಡುವ ಯಾವುದೇ ರೀತಿಯ ಅಕ್ರಮ ವಾಹನ ಮಾರ್ಪಾಡುಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಸಂಚಾರ ಪೊಲೀಸ್ ಹಾಗೂ ಸಾರಿಗೆ ಇಲಾಖೆ ಸ್ಪಷ್ಟಪಡಿಸಿವೆ. ಈ ಪ್ರಕರಣವು ಯುವಕರಲ್ಲಿ ಹೆಚ್ಚುತ್ತಿರುವ ಅಪಾಯಕಾರಿ ಸ್ಟಂಟ್ ಸಂಸ್ಕೃತಿಗೆ ಎಚ್ಚರಿಕೆಯ ಗಂಟೆಯಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
