ನವದೆಹಲಿ: ಇಂಧನದಲ್ಲಿ 20% ಎಥನಾಲ್ ಮತ್ತು 80% ಪೆಟ್ರೋಲ್ ಇರುವ E20 ಪೆಟ್ರೋಲ್ ಬಳಕೆಗೆ ಸಂಬಂಧಿಸಿದಂತೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಸಂಸತ್ತಿನಲ್ಲಿ ಮಹತ್ವದ ಮಾಹಿತಿ ನೀಡಿದ್ದಾರೆ.
ಗಡ್ಕರಿ ಅವರ ಪ್ರಕಾರ, 2005ರಿಂದ 2016ರ ನಡುವೆ ತಯಾರಾದ ಕೆಲವು BS-III ವಾಹನಗಳಲ್ಲಿ E20 ಇಂಧನ ಬಳಸುವ ಸಂದರ್ಭದಲ್ಲಿ ರಬ್ಬರ್ನಿಂದ ತಯಾರಿಸಲಾದ ಕೆಲವು ಭಾಗಗಳು ಹಾಗೂ ಗ್ಯಾಸ್ಕೆಟ್ಗಳನ್ನು ಬದಲಾಯಿಸುವ ಅಗತ್ಯ ಉಂಟಾಗಬಹುದು. ಆದರೆ ಇದಕ್ಕಾಗಿ ಸಂಪೂರ್ಣ ಎಂಜಿನ್ ಬದಲಾವಣೆ ಅಥವಾ ದೊಡ್ಡ ಮಟ್ಟದ ತಾಂತ್ರಿಕ ಮಾರ್ಪಾಡು ಅಗತ್ಯವಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಅವರು ಮತ್ತಷ್ಟು ತಿಳಿಸಿದಂತೆ, ಸರ್ಕಾರ ನಡೆಸಿರುವ ಅಧ್ಯಯನಗಳ ಪ್ರಕಾರ E20 ಇಂಧನದಿಂದ ವಾಹನಗಳ ಎಂಜಿನ್ ವೈಫಲ್ಯ (Engine Failure) ಉಂಟಾಗಿರುವುದಕ್ಕೆ ಯಾವುದೇ ವ್ಯಾಪಕ ಸಾಕ್ಷ್ಯಗಳು ಲಭ್ಯವಾಗಿಲ್ಲ.
ಇಂಧನ ದಕ್ಷತೆಯ ಕುರಿತು ಮಾತನಾಡಿದ ಸಚಿವರು, E20 ಬಳಕೆಯಿಂದ ವಾಹನದ ಮಾದರಿ ಹಾಗೂ ವಯಸ್ಸಿನ ಆಧಾರದ ಮೇಲೆ ಸುಮಾರು 2% ರಿಂದ 6% ವರೆಗೆ ಮೈಲೇಜ್ ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ತಿಳಿಸಿದ್ದಾರೆ.
ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ E20 ಪೆಟ್ರೋಲ್ ಕುರಿತು ಹಲವು ಆತಂಕಗಳು ವ್ಯಕ್ತವಾಗಿದ್ದ ಹಿನ್ನೆಲೆಯಲ್ಲಿ, ಕೇಂದ್ರ ಪೆಟ್ರೋಲಿಯಂ ಸಚಿವಾಲಯವೂ ಸ್ಪಷ್ಟನೆ ನೀಡಿ, E20 ಬಗ್ಗೆ ಹರಿದಾಡುತ್ತಿರುವ ಹಲವು ತಪ್ಪು ಕಲ್ಪನೆಗಳನ್ನು ತಳ್ಳಿ ಹಾಕಿದೆ. ಸರ್ಕಾರದ ಪ್ರಕಾರ, ಹೆಚ್ಚಿನ ವಾಹನಗಳು E20 ಬಳಸಲು ಸಮರ್ಥವಾಗಿದ್ದು, ಹಳೆಯ ವಾಹನಗಳೂ ಸಾಮಾನ್ಯವಾಗಿ ಬಳಸಬಹುದಾದರೂ, ಕೆಲವು ವಾಹನಗಳಲ್ಲಿ ನಿರ್ದಿಷ್ಟ ಭಾಗಗಳ ಬದಲಾವಣೆ ಅಗತ್ಯವಾಗಬಹುದು ಎಂದು ತಿಳಿಸಿದೆ.
