ಯಾವುದೋ ಸಿನಿಮಾದ ಪೂರ್ವಯೋಜಿತ ಸ್ಕ್ರಿಪ್ಟ್‌ನಿಂದಲೋ ಅಥವಾ ನಿರ್ಮಾಪಕರು ಹಣ ಸುರಿದು, ನಿರ್ದೇಶಕರು ಆಕ್ಷನ್ ಕಟ್ ಹೇಳಿದಂತೆ ನಟಿಸಿದ ಪರಿಣಾಮವಾಗಿ ‘ಕಾಕ್ರೋಜ್ ಜನತಾ ಪಾರ್ಟಿ’ (CJP) ಹುಟ್ಟಿಕೊಂಡಿದ್ದಲ್ಲ. ಇದು ಪ್ರಸ್ತುತ ವ್ಯವಸ್ಥೆಯ ವೈಫಲ್ಯಗಳಿಂದ ನೊಂದ, ಪದವಿ ಮುಗಿಸಿದರೂ ಉದ್ಯೋಗವಿಲ್ಲದೆ ಕಂಗಾಲಾದ ವಿದ್ಯಾರ್ಥಿ-ಯುವ ಸಮೂಹದ ಸ್ವಾಭಾವಿಕ ಸಿಟ್ಟು ಮತ್ತು ಪ್ರತಿರೋಧದ ಕೂಗು.
ನ್ಯಾಯಾಲಯವೊಂದರಲ್ಲಿ ನಡೆದ ವಿಚಾರಣೆ ವೇಳೆ, “ದೇಶದಲ್ಲಿ ಇಂತಹ ಕಾಕ್ರೋಜ್‌ಗಳು ಹೆಚ್ಚಾಗಿದ್ದಾರೆ, ಸಿಸ್ಟಮ್ ಅನ್ನು ಪ್ರಶ್ನಿಸುವುದೇ ಇವರ ಕೆಲಸ, ಇವರಿಗೆ ಬೇರೆ ಕೆಲಸವಿಲ್ಲವೇ?” ಎಂಬಂತಹ ಕಟು ಮಾತುಗಳು ಕೇಳಿಬಂದಾಗ ಯುವಪಡೆಯಲ್ಲೊಂದು ಕಿಡಿ ಹೊತ್ತಿಕೊಂಡಿತು. ಆ ಆಕ್ರೋಶ ಕೇವಲ ಇನ್‌ಸ್ಟಾಗ್ರಾಮ್ ಪೇಜ್‌ನಿಂದ ಆರಂಭವಾದರೂ, ನಂತರ ದೇಶದ ವಾಸ್ತವ ಸಮಸ್ಯೆಗಳನ್ನು ಮುನ್ನೆಲೆಗೆ ತರುವ ಜನಚಳವಳಿಯಾಗಿ ಮಾರ್ಪಟ್ಟಿತು. ಇದು ಕ್ಯಾಮರಾ ಮುಂದಿನ ನಟನೆಯಲ್ಲ, ಹೊಟ್ಟೆಯುರಿದ ಯುವಜನತೆಯ ನೈಜ ಧ್ವನಿ.
ನೀಟ್ ಅಕ್ರಮ ಮತ್ತು ಬೀದಿಗಿಳಿದ ಆಕ್ರೋಶ
ನೀಟ್ ಪರೀಕ್ಷಾ ಪೇಪರ್ ಸೋರಿಕೆ ವಿವಾದ ದೇಶದ ಲಕ್ಷಾಂತರ ವಿದ್ಯಾರ್ಥಿಗಳ ಭವಿಷ್ಯವನ್ನು ಅತಂತ್ರಗೊಳಿಸದಿದ್ದರೆ, ಅಭಿಜೀತ್ ದೀಪ್ಕೆಯಂತಹ ಹೋರಾಟಗಾರರು ಜಂತರ್ ಮಂತರ್‌ನ ಬಿಸಿಲಿನಲ್ಲಿ ಕೂತು ಹೋರಾಟ ಮಾಡುವ ಅಗತ್ಯವೇನಿತ್ತು? ಸಾವಿರಾರು ಕ್ಯಾಮೆರಾಗಳ ಮುಂದೆ ಕಣ್ಣೀರು ಹಾಕುವ ಅನಿವಾರ್ಯತೆ ಯುವಜನತೆಗೆ ಏಕೆ ಬರುತ್ತಿತ್ತು? ಅವರು ಯಾರೂ ಪ್ರಚಾರಕ್ಕಾಗಿ ಮೀಡಿಯಾಗಳನ್ನು ಕರೆಸಿಕೊಳ್ಳಲಿಲ್ಲ; ಬದಲಾಗಿ ಅವರು ಎತ್ತಿದ ಧ್ವನಿ ದೇಶದ ಪ್ರತಿಯೊಂದು ಕುಟುಂಬಕ್ಕೂ ಮುಟ್ಟುವಂತಿದ್ದ ಕಾರಣ ಇಡೀ ದೇಶವೇ ಅವರ ಕಡೆ ನೋಡುವಂತಾಯಿತು. ಈ ಹೋರಾಟದ ತೀವ್ರತೆಯೇ ಅಂದಿನ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆಗೆ ಒತ್ತಡ ಹೇರುವಷ್ಟು ಬೃಹತ್ ಆಂದೋಲನವಾಯಿತು.
ಆಡಳಿತದ ಹೈಡ್ರಾಮಾ: ವಿಮಾನದಲ್ಲೇ ಬಂಧನ ಮತ್ತು ಎಡಿಟೆಡ್ ವಿಡಿಯೋ ರಾಜಕೀಯ
ಚುನಾವಣಾ ಆಯೋಗದ ಜ್ಞಾನೇಶ್ ಕುಮಾರ್ ವಿರುದ್ಧ ಹೋರಾಟ ರೂಪಿಸಿದ ಸಂದರ್ಭದಲ್ಲಿ ವ್ಯವಸ್ಥೆ ಎದುರಿಸಿದ ಮುಜುಗರ ಮತ್ತು ನಡೆಸಿದ ತಂತ್ರಗಳು ಎಲ್ಲರಿಗೂ ತಿಳಿದಿವೆ. ದೇಶದ ಇತಿಹಾಸದಲ್ಲೇ ಅತ್ಯಂತ ಅಸಾಮಾನ್ಯವೆಂಬಂತೆ ಅಭಿಜೀತ್ ದೀಪ್ಕೆ ಸೇರಿದಂತೆ ಸಿಜೆಪಿ ಹೋರಾಟಗಾರರನ್ನು ವಿಮಾನದಲ್ಲೇ ಬಂಧಿಸಲಾಯಿತು. ಆದರೆ ನ್ಯಾಯಾಲಯದಲ್ಲಿ ಆಧಾರಗಳಿಲ್ಲದ ಕಾರಣ ಮರುದಿನವೇ ಅವರನ್ನು ಬಿಡುಗಡೆ ಮಾಡಬೇಕಾಯಿತು.
ಈ ವೇಳೆ ಮತ್ತೊಂದು ವಿವಾದ ಮುನ್ನೆಲೆಗೆ ಬಂತು. ಬಂಧನದ ಅವಧಿಯಲ್ಲಿ ದೀಪ್ಕೆಯವರ ಅಜ್ಜಿ ನಿಧನರಾಗಿದ್ದರೂ, ಆ ವಿಷಯವನ್ನು ಅವರಿಗೆ ತಕ್ಷಣ ತಿಳಿಸದೆ ಮಧ್ಯರಾತ್ರಿ 3 ಗಂಟೆಗೆ ತಿಳಿಸಲಾಗಿತ್ತು. ಅಷ್ಟು ಹೊತ್ತಿಗೆ ಹೋಗಿ ನಾನೇನು ಮಾಡಲಿ, ತಂದೆಯ ದುಃಖವನ್ನು ಇನ್ನಷ್ಟು ಹೆಚ್ಚಿಸಲು ಬಯಸುವುದಿಲ್ಲ ಎಂದಿದ್ದ ಮಾತನ್ನೇ ಕತ್ತರಿಸಿ, ಪೊಲೀಸ್ ಇಲಾಖೆಯಿಂದ ಕೇವಲ ಎಡಿಟ್ ಮಾಡಿದ ಭಾಗವನ್ನು ಬಿಡುಗಡೆ ಮಾಡಲಾಯಿತು—ದೀಪ್ಕೆ ಸ್ವತಃ ಹೋಗಲು ನಿರಾಕರಿಸಿದರು ಎಂಬಂತೆ ಬಿಂಬಿಸಿ ಸಾರ್ವಜನಿಕರ ದಾರಿ ತಪ್ಪಿಸಲಾಯಿತು. “ಧೈರ್ಯವಿದ್ದರೆ ಪೂರ್ತಿ ವಿಡಿಯೋ ಬಿಡುಗಡೆ ಮಾಡಿ” ಎಂದು ದೀಪ್ಕೆ ಸವಾಲು ಹಾಕಿದರೂ, ಪ್ರೊಪಗಾಂಡಾ ಯಂತ್ರಗಳಿಗೆ ಸತ್ಯವನ್ನು ಒಪ್ಪುವ ತಾಳ್ಮೆ ಇರಲಿಲ್ಲ.
ಆಧಾರರಹಿತ ಆರೋಪಗಳು ಮತ್ತು ಮಾಧ್ಯಮಗಳ ಸ್ಪಷ್ಟೀಕರಣ
ಇತ್ತೀಚೆಗೆ ಅಭಿಜೀತ್ ದೀಪ್ಕೆ ವಿರುದ್ಧ ಹಳೆಯ ಸಹಪಾಠಿ ಎನ್ನಲಾದ ವ್ಯಕ್ತಿಯೊಬ್ಬರು, “ನಾನು ಅವರ ಕಾಲೇಜಿನಲ್ಲಿದ್ದವನು, ಅವರ ಎಲ್ಲ ರಹಸ್ಯಗಳು ಗೊತ್ತು, ಅವರು ದೇಶವಿರೋಧಿ ಹಾಗೂ ವಂಚಕ” ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಹೇಳಿಕೆಗಳನ್ನು ಹರಿಬಿಟ್ಟರು. ಈ ಆರೋಪಗಳನ್ನು ವ್ಯವಸ್ಥಿತವಾಗಿ ವೈರಲ್ ಮಾಡಲಾಯಿತು. ಆದರೆ, ‘ದಿ ಇಂಡಿಯನ್ ಎಕ್ಸ್‌ಪ್ರೆಸ್’ ಸೇರಿದಂತೆ ಪ್ರಮುಖ ಮಾಧ್ಯಮಗಳು ನಡೆಸಿದ ಪರಿಶೀಲನೆಯಲ್ಲಿ ಆ ಆರೋಪಗಳಿಗೆ ಯಾವುದೇ ಬಲವಾದ ಆಧಾರಗಳಿಲ್ಲ ಎಂಬುದು ಬಹಿರಂಗಗೊಂಡಿದೆ. ಇನ್ನೂ ಗಮನಿಸ ಬೇಕಾದ ವಿಷಯ ಏನೆಂದರೆ ದೀಪ್ಕೆ ಸಹಪಾಠಿಯ ಹೆಸರು ಏನೆಂಬುದು ಯಾರಿಗೂ ಗೊತ್ತಿಲ್ಲ..
ಆದರೆ ಸುಳ್ಳು ಸುದ್ದಿಗಳನ್ನೇ ಬಂಡವಾಳ ಮಾಡಿಕೊಂಡಿರುವ ಪ್ರೊಪಗಾಂಡಾ ಜಾಲಕ್ಕೆ ಸತ್ಯ ಅಥವಾ ಪುರಾವೆಗಳ ಅಗತ್ಯವೇ ಇಲ್ಲದಂತಾಗಿದೆ. ದೀಪ್ಕೆ ದಾಖಲೆ ಕೇಳಿದರೆ, ಪೂರ್ತಿ ವಿಡಿಯೋ ಹಾಕಿ ಎಂದು ಸವಾಲು ಹಾಕಿದರೆ ಉತ್ತರವಿಲ್ಲದೆ ವಿಷಯಾಂತರ ಮಾಡುವ ಮಾನಸಿಕತೆ ಹೆಚ್ಚುತ್ತಿದೆ.
ಹೋರಾಟವನ್ನು ಹತ್ತಿಕ್ಕಲು ಸಾಧ್ಯವಾಗದಿದ್ದಾಗ ಹೋರಾಟಗಾರರ ಚಾರಿತ್ರ್ಯಹರಣ ಮಾಡುವುದು ಹಳೆಯ ರಾಜಕೀಯ ತಂತ್ರ. ದೀಪ್ಕೆ ಮತ್ತು ಅವರ ಜತೆಗಿರುವ ಯುವ ಸಮೂಹದ ಮೇಲಿನ ಈ ದಾಳಿಗಳು ಕೇವಲ ವೈಯಕ್ತಿಕವಲ್ಲ; ಬದಲಾಗಿ ನಿರುದ್ಯೋಗ, ಪರೀಕ್ಷಾ ಅಕ್ರಮ ಮತ್ತು ಆಡಳಿತ ವೈಫಲ್ಯಗಳನ್ನು ಪ್ರಶ್ನಿಸುವ ಸಾಮಾನ್ಯ ನಾಗರಿಕರ ಧ್ವನಿಯನ್ನು ಅಡಗಿಸಲು ನಡೆಯುತ್ತಿರುವ ರಾಜಕೀಯ ಷಡ್ಯಂತ್ರ ಎಂಬುದನ್ನು ದೇಶದ ಪ್ರಜ್ಞಾವಂತ ಸಮಾಜ ಗುರುತಿಸಬೇಕಿದೆ.
