ತುಳು ಕವನ : ಕುಡಬಲ ಕರಂಗೊಲು

ಪೊಲಿ ಪೊಲಿಂದ್ ಲೆತೋಂದಿತ್ತಿನಾ
ಓ ಕರಗೊಂಲು
ಜಾಲ್ ಡ್ ಸ್ವರ ಕೆನಾಂದೇ ಆಂಡ್
ಏತೋ ವರ್ಷೊಲು
ಕುಡಬಲಾ ಪೊಲಿತಾ ಕಮ್ಮೆನಾ
ದಿಂಜಾವೊಂದು
ತುಳುನಾಡ ಪೊರ್ಲುಪೊಲಿಗೆನ್
ಹೆಚ್ಚಾವೊಂದು

ಮಾಯಿದ ಸಂಕ್ರಾಂತಿಗ್ ಸುರು ಅಪುಂಡು
ನಿನ್ನ ರೂಪ
ಒಂಜಿ ತಿಂಗೊಳಿಡಿ ನಿನ್ನ ನಲಿಕೆನ್
ಎಂಕ್ಲ ತೂಪ
ಪೊರ್ಲು ಪೊರ್ಲುದ ಸಂದಿಪಾಡ್ದನಾದ್ದ
ಸ್ವರ ಕೊರ್ಪ
ಸುಗ್ಗಿ ಸಂಕ್ರಾಂತಿಗ್ ದುಂಬು ಮಾರಿಗೀರಿನ್
ಕಳೆವೊಂದು ಪೊಪ

ಕೆಂಪುಪಟ್ಟೆದ ಬೊಲ್ದುಕುಂಟು ತುತ್ತುದು
ಮುಂಡಾಸ್ ಕಟ್ಟ್ ವೇರ್
ಜೇಡಿಮಣಿ ಕಲಾಡದ್ ಬೇರಿತಿಗಲೆಗ್
ಬರೆ ಒಯಿಪುವೇರ್
ಉರುಂಟು ಉರುಂಟುದ ಅಚ್ಚಿಲೇನ್
ಮೈನಿಲಿಕ್ಕೆ ಪಾಡುವೇರ್
ನೆಕ್ಕಿತಪ್ಪು ಕೈಟ್ ಪತ್ತ್ ದ್ದ್
ಪೊಲಿಂದ್ ಲೆಪುವೇರ್

ಪಗೆಲ್ ದೇವೆರ್ ಕಂತಿ ಬೊಕ್ಕ
ಏಸ ಪಾಡುವೇರ್
ಇರ್ಲ್ಇಡೀ,ಊರು ಊರ್ದ
ಜಾಲ್ ಜಾಲ್ಡ್ ನಲಿಪುವೆರ್
ನಲಿಕೆದ ಇನಾಮು ಪಂಡ್ದ್
ಅರಿತಾರಾಯಿ ಗೆತೊನುವೆರ್
ಇರ್ಲ್ ದೇವೆರ್ ಕಂತ್ಯಾರ ದುಂಬು
ಏಷ ದೆಪುವೆರ್

ಕರಂಗೊಲು ಪಾಡಿನಗ್ಲೂ
ಸಾರಮಾನಿ ದೈವೊಲುಗೆ
ಅತಿಕಾರ ಬುದೆನ್ ತುಳುನಾಡ್ಗ್
ಕನವರೆಗೇ
ಅವೆತ ನೆಂಪೇ ಕರಂಗೊಲು
ಗೊಬ್ಬುಗ್ಗೆ
ಕರಂಗೊಲು ಇಲ್ಲಗ್ ಬತ್ಂಡ
ಪೊಲಿ ಹೆಚ್ಚಂಪುಡಿಗೇ

ಕರಂಗೊಲು ನೆಲೆ ಅವಾಡ್
ಭೂಮಿಡ್
ತುಳುನಾಡ ಪರತೀರಿ ಪಸರಿಸಡ್
ಲೊಕಡ್
ತುಳುನಾಡ ಐಸಿರಾ ಹೆಚ್ಚವಾಡ್
ಕರಂಗೊಲು ಗೊಬ್ಬುಗು ಲೋಕನೇ
ತರೆತಗ್ಗವಾಡ್ ..

ಕೃಷ್ಣಪ್ಪ ಬಂಬಿಲ
ರಂಗ ನಿರ್ದೇಶಕರು, ಪುತ್ತೂರು