ಮಧ್ಯಪ್ರಾಚ್ಯದ ಪ್ರಮುಖ ಸಮುದ್ರ ಮಾರ್ಗವಾದ ಹಾರ್ಮುಜ್ ಸಮುದ್ರಸಂಧಿ ಕುರಿತಾಗಿ ಅಮೆರಿಕಾ–ಇರಾನ್ ನಡುವೆ ಉದ್ವಿಗ್ನತೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಈ ಹಿನ್ನೆಲೆ, ಇರಾನ್ ದೀರ್ಘಕಾಲದ ಯುದ್ಧಕ್ಕೂ ಸಿದ್ಧವಾಗಿದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
ಟೆಹ್ರಾನ್ ವಿಶ್ವವಿದ್ಯಾಲಯದ ಸಹಾಯಕ ಪ್ರಾಧ್ಯಾಪಕಿ ಝೊಹ್ರೆ ಖರಾಜ್ಮಿ ಅವರು ಹೇಳುವಂತೆ, ಹಾರ್ಮುಜ್ ಸಮುದ್ರಸಂಧಿಯ ಮೇಲೆ ಸ್ವಾಯತ್ತ ನಿಯಂತ್ರಣ ಇರಾನ್ಗೆ ಅತ್ಯಂತ ಮುಖ್ಯವಾಗಿದೆ. “ಈ ರಾಷ್ಟ್ರದ ಜನರು ಹೇಗೆ ವರ್ತಿಸಬೇಕು, ಯಾವ ಹಡಗುಗಳು ಈ ಮಾರ್ಗದಲ್ಲಿ ಸಂಚರಿಸಬೇಕು ಎಂದು ಅಮೆರಿಕಾ ನಿರ್ಧರಿಸುವ ಹಕ್ಕು ಹೊಂದಿಲ್ಲ,” ಎಂದು ಅವರು ಹೇಳಿದ್ದಾರೆ.
ಇರಾನ್ ಈಗಾಗಲೇ ಸ್ನೇಹಿತ ರಾಷ್ಟ್ರಗಳು ಮತ್ತು ವಿರೋಧಿ ರಾಷ್ಟ್ರಗಳ ನಡುವಿನ ವ್ಯತ್ಯಾಸವನ್ನು ಸ್ಪಷ್ಟಪಡಿಸಿದೆ. ಪಾಕಿಸ್ತಾನ, ಇರಾಕ್ ಮತ್ತು ಕೆಲವು ಚೀನಾ ಹಾಗೂ ಫ್ರಾನ್ಸ್ ಹಡಗುಗಳಿಗೆ ಈ ಮಾರ್ಗದಲ್ಲಿ ಸಂಚರಿಸಲು ಅವಕಾಶ ನೀಡಲಾಗಿದೆ ಎಂದು ಅವರು ಉಲ್ಲೇಖಿಸಿದ್ದಾರೆ.
“ಇರಾನ್ ಜೊತೆ ಒಪ್ಪಂದ ಮತ್ತು ಸಹಕಾರಕ್ಕೆ ಬರುವ ರಾಷ್ಟ್ರಗಳು ಹೆಚ್ಚಿನ ಪ್ರಯೋಜನ ಪಡೆಯುತ್ತಿವೆ,” ಎಂದು ಖರಾಜ್ಮಿ ಹೇಳಿದ್ದಾರೆ.
ಅಮೆರಿಕಾ ಹಾರ್ಮುಜ್ ಸಮುದ್ರಸಂಧಿಯನ್ನು ಬಂದ್ ಮಾಡುವ ಯತ್ನ ಮಾಡಿದರೆ ಅದರ ಪರಿಣಾಮ ಜಾಗತಿಕ ಮಟ್ಟದಲ್ಲಿ ಭಾರೀ ಹೊಡೆತ ನೀಡಬಹುದು ಎಂದು ಅವರು ಎಚ್ಚರಿಸಿದ್ದಾರೆ. “ಹಾರ್ಮುಜ್ ಬಗ್ಗೆ ಮಾತನಾಡುವುದಾದರೆ, ಅದು ಕೇವಲ ತೈಲವಷ್ಟೇ ಅಲ್ಲ; ರಸಗೊಬ್ಬರ, ಹೆಲಿಯಂ ಸೇರಿದಂತೆ ಅನೇಕ ಪ್ರಮುಖ ವಸ್ತುಗಳ ಸಾಗಣೆ ಇದರಿಂದಲೇ ನಡೆಯುತ್ತದೆ. ಈ ಮಾರ್ಗ ಬಂದ್ ಆದರೆ ವಿಶ್ವದ ಹಲವಾರು ಕೈಗಾರಿಕೆಗಳು ಕುಸಿಯುವ ಸಾಧ್ಯತೆ ಇದೆ,” ಎಂದು ಅವರು ಹೇಳಿದ್ದಾರೆ.
