ಸ್ಯಾಂಡಲ್‌ವುಡ್‌ನಲ್ಲಿ ಸದ್ಯ ‘ಸಿಟಿ ಲೈಟ್ಸ್’ ಸಿನಿಮಾದದ್ದೇ ಚರ್ಚೆ. ದುನಿಯಾ ವಿಜಯ್ ನಿರ್ದೇಶನದ, ವಿನಯ್ ರಾಜ್‌ಕುಮಾರ್ ಹಾಗೂ ದುನಿಯಾ ವಿಜಯ್ ಪುತ್ರಿ ಮೋನಿಷಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಚಿತ್ರದ ಟ್ರೈಲರ್ ಇತ್ತೀಚೆಗೆ ಬಿಡುಗಡೆಯಾಗಿದ್ದು, ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ. ಸಿನಿಮಾ ಇದೇ ಸೆಪ್ಟೆಂಬರ್ 18ರಂದು ರಾಜ್ಯಾದ್ಯಂತ ತೆರೆಗೆ ಬರಲಿದೆ.
ಟ್ರೈಲರ್‌ನಲ್ಲಿ ಇದುವರೆಗೆ ಕಾಣಿಸಿಕೊಂಡಿದ್ದ ಚಾಕಲೇಟ್ ಬಾಯ್ ಇಮೇಜ್‌ನಿಂದ ಹೊರಬಂದಿರುವ ವಿನಯ್ ರಾಜ್‌ಕುಮಾರ್ ರಗಡ್ ಮಾಸ್ ಅವತಾರ ವಿಶೇಷವಾಗಿ ಗಮನ ಸೆಳೆಯುತ್ತಿದೆ. ಕೈಯಲ್ಲಿ ಲಾಂಗ್ ಹಿಡಿದು ಕಾಣಿಸಿಕೊಂಡಿರುವ ವಿನಯ್, ಆಕ್ಷನ್ ಮತ್ತು ಅಂಡರ್‌ವರ್ಲ್ಡ್ ಹಿನ್ನೆಲೆಯ ಪಾತ್ರದಲ್ಲಿ ಹೊಸ ರೀತಿಯಲ್ಲಿ ಕಾಣಿಸಿಕೊಂಡಿದ್ದಾರೆ. ಟ್ರೈಲರ್‌ನಲ್ಲಿನ ಅವರ ಲುಕ್, ಡೈಲಾಗ್ ಡೆಲಿವರಿ ಹಾಗೂ ಬಾಡಿ ಲ್ಯಾಂಗ್ವೇಜ್‌ಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಇನ್ನು ದುನಿಯಾ ವಿಜಯ್ ಪುತ್ರಿ ಮೋನಿಷಾ ಅವರಿಗೂ ಇದು ಪ್ರಮುಖ ಸಿನಿಮಾ. ‘ಸಿಟಿ ಲೈಟ್ಸ್’ ಮೂಲಕ ಅವರು ನಾಯಕಿಯಾಗಿ ಚಿತ್ರರಂಗಕ್ಕೆ ಎಂಟ್ರಿ ಕೊಡುತ್ತಿದ್ದು, ಟ್ರೈಲರ್‌ನಲ್ಲಿನ ಅವರ ಪಾತ್ರವೂ ಕುತೂಹಲ ಮೂಡಿಸಿದೆ. ಈ ಸಿನಿಮಾದಲ್ಲಿ ವಿನಯ್ ಮತ್ತು ಮೋನಿಷಾ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ದುನಿಯಾ ವಿಜಯ್ ಅವರ ನಿರ್ದೇಶನದ ಶೈಲಿ ಕೂಡ ಟ್ರೈಲರ್‌ನಲ್ಲಿ ಮತ್ತೊಮ್ಮೆ ಎದ್ದು ಕಾಣುತ್ತಿದೆ. ಕಚ್ಚಾ ಮಾಸ್ ಟಚ್, ಕ್ರೈಂ, ಆಕ್ಷನ್ ಮತ್ತು ಅಂಡರ್‌ವರ್ಲ್ಡ್ ಹಿನ್ನೆಲೆಯ ಅಂಶಗಳೊಂದಿಗೆ ಸಿನಿಮಾ ಮೂಡಿಬಂದಿರುವ ಸೂಚನೆ ಟ್ರೈಲರ್‌ನಿಂದ ಸಿಗುತ್ತಿದೆ.
ಶಿವಣ್ಣನ ಮಾತಿಗೆ ವಿಶೇಷ ಗಮನ!
‘ಸಿಟಿ ಲೈಟ್ಸ್’ ಟ್ರೈಲರ್ ಅನ್ನು ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಬಿಡುಗಡೆ ಮಾಡಿದ್ದಾರೆ. ಕಾರ್ಯಕ್ರಮದಲ್ಲಿ ವಿನಯ್ ರಾಜ್‌ಕುಮಾರ್ ಅವರ ಹೊಸ ಅವತಾರವನ್ನು ಶಿವಣ್ಣ ಮೆಚ್ಚಿಕೊಂಡಿದ್ದು, ಅಂಡರ್‌ವರ್ಲ್ಡ್ ಸಿನಿಮಾಗಳು ಎಂದಾಗ ಶಿವಣ್ಣ ನೆನಪಾಗುವಂತೆ, ಇನ್ನು ಮುಂದೆ ವಿನಯ್ ಕೂಡ ನೆನಪಾಗಬಹುದು ಎಂಬ ರೀತಿಯಲ್ಲಿ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಇದೇ ಸಂದರ್ಭದಲ್ಲಿ ವಿನಯ್ ಅವರಿಗೆ ‘ಸ್ಯಾಂಡಲ್ ಮಯೂರ’ ಎಂಬ ಬಿರುದನ್ನೂ ನೀಡಲಾಗಿದೆ.
ಅಂದಹಾಗೆ, ‘ಸಿಟಿ ಲೈಟ್ಸ್’ ದುನಿಯಾ ವಿಜಯ್ ನಿರ್ದೇಶನದ ಮೂರನೇ ಸಿನಿಮಾ. ‘ಜವಾಬ್ ದಾರಿ ದೀಪಗಳು’ ಎಂಬ ಟ್ಯಾಗ್‌ಲೈನ್ ಹೊಂದಿರುವ ಈ ಚಿತ್ರವು ಬೆಂಗಳೂರಿನ ಬದುಕು, ಹೋರಾಟ ಮತ್ತು ಅದರ ಕರಾಳ ಮುಖವನ್ನು ವಿಭಿನ್ನ ರೀತಿಯಲ್ಲಿ ಕಟ್ಟಿಕೊಡಲಿದೆ ಎಂಬ ನಿರೀಕ್ಷೆ ಮೂಡಿಸಿದೆ.
ಸೆಪ್ಟೆಂಬರ್ 18ರಂದು ‘ಸಿಟಿ ಲೈಟ್ಸ್’ ಚಿತ್ರಮಂದಿರಕ್ಕೆ, ಟ್ರೈಲರ್ ಹುಟ್ಟಿಸಿರುವ ನಿರೀಕ್ಷೆಯನ್ನು ಸಿನಿಮಾ ಎಷ್ಟರ ಮಟ್ಟಿಗೆ ಪೂರೈಸಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
ಸಿನಿಮಾ ಸುದ್ದಿ: ರಿಯಾಝ್‌ ಚಿಂಗಾರಿ (ಪ್ರಜಾಪರ)
